Во Младинскиот културен центар на 5 и 6 ноември се одржува концертниот настан „Музички блок“. Во двете вечери настапуваат групи што го носат новиот звук на македонската, но и на регионалната музичка сцена.

Првата вечер ќе го донесе беспрекорно фасцинантниот источномакедонски ритам и бит на групата „Калата“, фантастичните „Светлост + Одрон ритуал оркестра“, кои како повод го имаа новиот албум објавен под етикетата на „СЏФ рекордс“, како и соничното истражување возено од тројца уникатни инструменталисти од Скопје, кои се именуваат како „3 Јест“.

За втората вечер се најавени концертите на гостите „Роза“ од Србија и „Немања“ од Хрватска. Како домашна поддршка ќе настапи „21 век“, новиот бенд-проект на Васко Атанасоски (Бернајс пропаганда), кој со својата верна екипа Дени Крстев и Раде Јордановски ќе го промовираат новиот албум „Си нацртав живот“.