Мала вознемиреност и напнатост, но голема раздвиженост по ходниците и собите, медицински персонал со заштита опрема растрчан низ ходниците, се дава терапија, се прават испитувања, се носат мобилни апарати. Ваква е атмосферата на Клиниката за инфективни болести во која повеќе од два месеци лекарите, медицинските сестри и другиот персонал неуморно се борат за животот и здравјето на пациентите кои се инфицирани со вирусот ковид-19.

Собите се полни со пациенти, некои веќе во подобра состојба, среќни дека ја добиле битката со болеста. Други пак во лоша состојба, се борат за секој следен здив. Има и такви кои, иако се чувствуваат подобро и се во очекување на пуштање дома, сепак се со тажни изрази на лицата бидејќи некој близок од нивното семејство не успеал да се излекува. Најтажна глетка е секако на интензивната нега каде животот на пациентите се одржува со апаратите кои дишат наместо белите дробови на пациентите, во очекување со терапијата која им се дава здравствената состојба да се  подобри.

Она што паѓа во очи кога се движите низ собите е дека клиниката дефинитивно се модернизирала, па може да се видат нови кревети, монитори, нови респиратори, подвижни рентген апарати и други најсовремени апарати за следење на состојбата на пациентите.

Денеска на Клиниката имаше 40 пациенти, меѓу нив ќе видите и некој познат лик, политичар или од другиот јавен живот, никој не е имун на ковид-19. Бројките велат дека во овој период низ оваа клиника поминале 317 пациенти, од кои 210 си заминале во добра здравствена состојба, излекувани од ковид-19. Тоа не се само бројки туку реални луѓе кои без разлика дали верувале или не во тоа дека вирусот постои сепак завршиле на Клиниката за инфективни болести.