Зоолошка градина Скопје на својот Фејсбук профил објави дека повредениот лебед кој бил пронајден во Градскиот Парк бил излечен и однесен во ново живеалиште.

„Повредениот лебед којшто беше најден во Градски Парк е рехабилитиран, лекуван и конечно однесен во мирно и тивко живеалиште.

Лебедот беше пронајден во езерото во Градски Парк, за жал повреден од човечка сурова рака и со речиси откинато ноџе. Ногата беше оперирана, лекувана и ампутирана. Во Зоо Скопје го помина периодот на лекување, рехабилитација и адаптација, а сега мирно плива во езерцето опкружено со зеленило на имотот на Етно Село Тимчевски Куманово. Нашиот тим секако ќе продолжи да го посетува, а во Етно Село за него ќе се грижат љубители на животни.

Апелираме до сите- Не ги повредувајте животните, пружете љубов и внимание. Учете ги најмалите секогаш да застанат во нивна одбрана затоа што за жал се беспомошни кога е во прашање суровоста на човекот.“, напишаа од скопската Зоолошка градина.