Илјадници граѓани се собраа во зоолошката градина Уено во Токио за последен пат да ги видат близначките панди Сјао Сјао и Леи Леи, кои кон крајот на јануари ќе бидат вратени во Кина, со што Јапонија првпат по повеќе од половина век ќе остане без панди, објави „AP“.

Метрополитенската влада на Токио соопшти дека последниот ден за јавно гледање на пандите ќе биде 25 јануари, по што четиригодишните близнаци, родени во зоолошката градина Уено во јуни 2021 година, ќе бидат вратени во Кина во согласност со договорот за позајмица.

Пекинг традиционално им доделува на пандите улога на „дипломатија на добра волја“, но го задржува сопствеништвото над животните и нивните потомци.

Посетителите чекале и по два часа за да добијат една минута за набљудување на пандите.

Од наредната недела, само 4.800 однапред регистрирани посетители дневно ќе имаат можност да ги видат.

Јапонските официјални лица изразија надеж дека „панда-дипломатијата“ ќе продолжи.

Главниот секретар на кабинетот на Јапонија, Минору Кихара, изјави дека пандите долго време биле омилени во Јапонија и дека властите се надеваат на продолжување на размената со Кина, додека одделни локални самоуправи и зоолошки градини веќе изразиле интерес за нови панди.

Зоолошката градина Уено соопшти дека засега ќе го задржи просторот за панди и ќе промовира други животни додека чека евентуално пристигнување на нови примероци.