Социјалдемократската премиерка на Шведска, Магдалена Андерсон, го призна поразот на изборите, предавајќи го раководството на земјата на десничарскиот блок од четири партии.

Сите гласови сè уште не се преброени, но Андерсон, која минатата година стана првата премиерка на Шведска, рече дека резултатите покажале оти десничарскиот блок победил.

„Затоа, утре ќе побарам од претседателот на Парламентот да ја напуштам мојата функција”, рече премиерката на прес-конференција.

Умерените, Шведските демократи, демохристијаните и либералите треба да имаат 176 претставници во 349-члениот парламент по изборите. Левиот блок освои 173 места, покажуваат некомплетните резултати.

Изборите претставуваат пресвртница во шведската политика бидејќи антиимигрантската партија Шведски демократи, игнорирана од сите други партии откако влегоа во парламентот во 2010 година, треба за првпат да станат дел од владата.

Тие се на пат да освојат 20,6 отсто од гласовите и со тоа да станат најголемата десничарска партија, надминувајќи ги Умерените кои имаат 19,1 отсто.

Иако партијата на Улф Кристерсон е послаба во однос на резултатите, лидерот на Шведските демократи Џими Акесон нема способност да ја собере широката поддршка потребна за соборување на социјалдемократите.