Според извештаите на медиумите и аналитичарите, Северна Кореја е подготвена да затвори десетина амбасади, вклучително и во Шпанија, Хонг Конг и повеќе земји во Африка, со потег што би можел да доведе до затворање на речиси 25 отсто од мисиите на Пјонгјанг ширум светот, пренесува Ројтерс.

Неодамнешното затворање на нејзините дипломатски претставништва од страна на Северна Кореја беше знак дека осаменичката земја се бори да заработи пари во странство поради меѓународните санкции, соопшти во вторникот јужнокорејското Министерство за обединување.

Во понеделникот, севернокорејскиот државен медиум КЦНА објави дека амбасадорите на земјата имале „проштална“ посета на лидерите на Ангола и Уганда минатата недела, а локалните медиуми во двете африкански земји објавија затворање на амбасадите на Северна Кореја. И Ангола и Уганда воспоставија пријателски врски со Северна Кореја од 1970-тите, одржувајќи воена соработка и обезбедувајќи ретки извори на странска валута, како што се проекти за градење статуи.

Затворањето на амбасадата го постави теренот за она што може да биде „еден од најголемите промени во надворешната политика на земјата во последните децении“, со импликации за дипломатски ангажман, хуманитарна работа во изолираната земја, како и способност за генерирање незаконски приходи, напиша Чад О’Керол, основач на веб-страницата НК Про фокусирана на Северна Кореја.

Повеќе од десетина мисии може да се затворат, најверојатно поради меѓународните санкции, трендот на глобално раздвојување на Пјонгјанг и веројатното слабеење на севернокорејската економија, рече тој во извештајот во средата.