Селекторот на фудбалската репрезентација на Мексико, Хавиер Агире (67), го поддржа својот наследник, Рафаел Маркез, по елиминацијата на неговиот тим од Англија во осминафиналето на Светското првенство, со што заврши низата победи на „Ацтека“, но и третиот мандат на искусниот експерт на клупата на мексиканскиот тим.

– Сакав да се збогувам со мојот народ со победа. Затоа ова боли, се обидовме. Играчите мора да си заминат од тука со кренати глави. Денес ова не требаше да се случи. Не ја искористивме можноста, но сакам да им се заблагодарам на сите – изјави Агире.

Натпреварот, кој беше одложен за еден час поради лошото време околу стадионот „Ацтека“, се играше пред страсна домашна публика, која Агире често ја опишуваше како „12-ти човек на Мексико“.

Домашните навивачи ги бодреа домаќините во последните минути, скандирајќи „да, можеме“ додека домаќините се обидуваа да израмнат, но Англичаните успеаја да се одбранат и да се пласираат во четвртфиналето, каде што ќе се соочат со Норвешка во Мајами во сабота.

Агире рече дека си заминува со гордост и покрај болката од елиминацијата, наведувајќи го единството на тимот и обновената врска со навивачите. Јавна тајна е дека Агире ќе го наследи на кормилото на националниот тим Маркез, легендарниот централен бек кој беше капитен на Мексико на пет светски првенства и веќе работеше заедно со Агире за време на турнирот.

– Заминувам со многу гордост. Овие играчи ме направија многу среќен. Го вративме чувството на припадност и идентитетот на овој тим. Му посакувам сè најдобро на Маркез. Тој е повеќе од способен и ќе биде подобар од мене – рече Агире.

ВИДЕО | Халанд ги урна мундијалските соништа на Бразил, Нејмар погоди за утеха

Досега девет селектори си поднесоа оставки по испаѓањето од Светското првенство