Службата за безбедност на Украина денеска соопшти дека не може ниту да потврди ниту да негира вмешаност во експлозијата на автомобил во која беше повреден рускиот писател Захар Прилепин или други напади.

„Официјално, не можеме ниту да потврдиме, ниту да негираме вмешаност во оваа или во други експлозии што се случуваат во просториите на окупаторите или нивните послушници, изјавија од СБУ за државната украинска новинска агенција Укринформ.

Рано утринава автомобилот со кој управувал Захар Прилепин бил разнесен на автопатот во Нижни Новгород, при што Прилепин се здобил со скршеници и потрес на мозокот, а неговиот возач загинал, пренесе РИА Новости.

Александар Пермјаков, уапсен по бомбашкиот напад на автомобилот на руски писател, признал дека дејствувал по наредба на украинските тајни служби, соопшти прес-службата на Рускиот истражен комитет.