Руски диџеј осуден зашто пуштил спот од украински рапер во кој имало снимки од озлогласениот полк „Азов“

Диџеј илустрација/ Фото Aleksandr Lupin / Alamy / Alamy / Profimedia

Судот на Крим осуди локален диџеј на 10 дена затвор поради пуштање спот од песна на украинскиот рапер Јармак за време на забава, пренесува „РСЕ“.

Окружниот суд на Крим на 15 август објави дека руски државјанин во градот Школкин е осуден на 10 дена затвор поради пуштање на спот од песната „Диво поле“ во локално кафуле.

Се вели дека спотот содржи „нацистички симболи на Азовскиот полк кои се забранети во Русија“.

Диџејот во кафулето на полицијата и рекол дека некој гостин го замолил да го пушти видеото.

Создаден во 2014 година како баталјон Азов откако Русија незаконски го анектираше Крим, Азовскиот полк е екстремно десничарска, целосно доброволна група која е дел од Украинската национална гарда.

Азовскиот полк се залага за ултра-националистичка идеологија која американската полиција ја поврза со неонацистичкиот екстремизам. Но, поддржувачите го гледаат како патриотски и ефективен сегмент од одбранбените сили на земјата, особено откако во февруари започна сеопфатната инвазија на руските сили.

азов харкив харков украина украински војник
Азов/ Фото EPA-EFE/ANDRZEJ LANGE POLAND OUT

Русија лажно тврди дека Украина е контролирана од нацистите и го искористи тоа тврдење меѓу своите оправдувања за својата неиспровоцирана инвазија.

Азовскиот полк се бореше со руските војници во јужниот град Мариупол со месеци пред околу 2.500 борци да се предадат во средината на мај.

На 2 август, Врховниот суд на Русија го прогласи Азовскиот полк за „терористичка“ организација.

Видео на денот