Руската апликација Телеграм се спаси од македонска блокада поради „Јавна соба“
Руската апликација Телеграм избегна да биде првата во Македонија што можеше да биде забранета за користење, откако е уважено барањето на македонскиот државен врв да се отстрани групата „Јавна соба“ на која се споделуваа недолични видеа, фотографии и лични податоци, најчесто од малолетнички од Македонија.
Министерот за внатрешни работи Оливер Спасовски вели дека групата „Јавна соба“ на апликацијата „Телеграм“ е затворена, но апелираше на внимателност, бидејќи на Телеграм имало друга слична група.
– Од Секторот за компјутерски криминал и дигитална форензика ме информираа дека групата „Јавна соба“ е затворена. Го поздравувам ваквиот чекор на платформата „Телеграм“ и порачувам дека оние што го прекршиле законот ќе бидат казнети, бидејќи ние целосно ги документираме случаите. Истовремено, апелирам за внимателност, бидејќи на платформата Телеграм има и друга слична група и ние соодветно ќе постапиме и за членовите на оваа група. Сите што го кршат законот соодветно ќе одговараат, напиша Спасовски на Фејсбук.
Во групата која беше откриена пред два дена, повеќе од 5.000 члена, повторно коментираа и споделуваа повеќе или помалку експлицитни фотографии, профили од социјални мрежи, адреси и телефонски броеви од девојки, меѓу кои и малолетнички. МВР потврди дека групата е избришана од страна на Телеграм, а досега за случајот се приведени четири лица, двајца од Битола, еден велешанец и штипјанец.