На Русија во текот на оваа година ѝ недостасувале 4,8 милиони работници, а проблемот ќе продолжи и во текот на идната година, изјавиле експерти од Економскиот институт на Руската академија за науки за весникот „Известија“.

Гувернерката на Централната банка, Елвира Набиулина, во ноември забележа дека економијата страда од кризата на пазарот на труд, што го загрозува растот особено поради пренасочување на огромни средства во „воената операција“ во Украина.

Пазарот на труд страдаше и од масовната мобилизација на 300.000 работоспособни луѓе во текот на 2022 година, како и од масовното отселување на младите за да не бидат регрутирани.

Претседателот Владимир Путин, пак, како успех на политиката на Кремљ ја истакна рекорно ниската стапка на невработеност од 2,9 отсто. При обраќањето до јавноста пред две недели тој истакна дека „нема потреба од нова мобилизација“.

Експертот Николај Ахапин, кој е главниот автор на истражувањето, забележува дека потребата за работници нагло се зголемила токму откако почна војната во Украина. Особено се барани возачи и продавачи. Официјалната статистика покажува дека непополнети се 6,8 отсто од потребните работни места, што е за 1 процент повеќе во споредба со истиот период лани.

Татјана Захарова од Универзитетот за економија „Плеханов“ вели дека проблемот ќе продолжи и низ целата 2024 година, при што најмногу ќе се бараат фабрички работници, инженери, лекари и наставници, покрај возачите и продавачите. Како фактори што придонесле за кризата таа ги посочи и „лошата демографија и миграцијата“.