Ренова, Шкендија и Силекс со нови мечеви во Лига Европа
Македонските фудбалски претставници се пред нов предизвик на меѓународната сцена, во овој случај денеска ќе се обидат да стигнат до третото квалификациско коло на Лига Европа.
Од 15.30 часот на ФФМ Тренинг центарот „Петар Милошевски“ во Скопје екипата на Ренова која претходно во Ерменија го елиминираше Алашкерт (0:1), сега ќе се обиде да направи уште едно изненадување, пред себе го има еден од најпознатите клубови во Хрватска, Хајдук.
Летово составот од Сплит го засили нашиот играч Јани Атанасов кој многу добро го знае теренот во кој има настапи за У21 македонската селекција.
Потоа, Шкендија од 17.45 часот во Романија ќе се соочи против Ботошани (моментно второпласиран во тамошниот шампионат) во чии редови настапуваат Стефан Ашковски и Давид Бабунски.
Играчите на тренерот Ернест Ѓока во претходната рунда во Азербејџан беа подобри од Сумгајит (0:2), го анализираа следниот ривал и најавуваат максимална борба за пласман во наредното коло.
– Нема да ни биде лесно, мислам дека онаа екипа која ќе направи помалку грешки на натпреварот, на крајот ќе триумфира – вели тренерот на Шкендија, Ѓока.
Силекс кој беше поразен во првото квалификациско коло од Лигата на шампионите од азербејџанскиот Карабах на гостински терен (4:0), автоматски се најде во 2. квалификациско коло на ЛЕ.
Клубот од Кратово од 20.00 часот на Националната арена „Тодор Проески“ ќе се обиде да дојде до победа против косовската екипа на Дрита која е предводена од тренерот Ардиан Нухиу, а во составот се наоѓаат уште дефанзивецот Ардиан Цуцули и новото засилување кое дојде од Вардар, Владица Брдаровски.
