Македонскиот прволигашки клуб Шкендија со ждрепка во Нион го доби ривалот во второто квалификациско коло на Лига Европа, а наредниот ден и потенцијалниот противник во следната фаза.

Тетовските „црвено-црни“ ќе се обидат да дојдат до поволен резултат, но истите амбиции ги имаат и нивните следни противници на меѓународната сцена, Ботошани од Романија.

За оваа екипа настапуваат двајца наши фудбалери, Стефан Ашковски и Давид Бабунски кои во првото квалификациско коло на ЛЕ го елиминираа претставникот на Казахстан, Ордабаси.

Дуелот помеѓу Ботошани и Шкендија е закажан за 17 септември на теренот во Романија.

– Ждрепката одлучи да играме со Шкендија, мечот ќе биде интересен. Играме на домашен терен и се надеваме на победа, но секако ја почитуваме Шкендија – ни изјави играчот на романскиот клуб Ботошани, Ашковски.

Во новата натпреварувачка сезона 2020/21 во најсилниот романски шампионат Ботошани стартуваше со две победи над Аргес (2:3) и Поли Јаши (4:0).

– Задоволен сум од настапите, тука во клубот е и Давид Бабунски. Имаме одличен тим и се надеваме дека оваа сезона ќе ја завршиме подобро отколку претходното четврто место – додаде Ашковски.