Руското Министерство за одбрана објави дека Валериј Герасимов, началник на Генералштабот на руските сили, е назначен за нов командант на здружените сили во, како што Москва ја нарекува инвазијата на таа земја, специјална воена операција во Украина.

Русија пред неколку месеци го назначи Сергеј Суровикин за командант на заедничките сили на Русија во Украина. Руските медиуми го нарекоа „Генерал Армагедон“ поради неговата наводна немилосрдност

Според Руското Министерство за одбрана Суровикин ќе биде заменик на Герасимов.

„Новите назначувања се поврзани со проширувањето на опсегот на задачите што треба да се решат и потребата да се организира поблиска интеракција меѓу видовите и видовите војници“, соопшти руското Министерство за одбрана.

Минатиот месец на социјалните мрежи кружеа гласини дека Герасимов е отпуштен, што дополнително беше засилено од британското Министерство за одбрана и Американскиот институт за проучување на војната. Руското Министерство за одбрана тогаш ги демантираше гласините, велејќи дека нема причина да се отпушти Герасимов.