Фудбалерите на Македонија Ѓорче Петров освоија исклучително важни три бода во трката за опстанок, откако на свој терен славеа против директниот ривал Работнички со 2-1 во рамки на 29. коло од Првата лига.

Домашниот состав уште на самиот старт покажа дека оди на победа и веќе во втората минута Хозе Кабаркас со прецизен удар со глава го отвори резултатот. Иако ситуацијата беше предмет на ВАР-проверка, погодокот сепак беше признат. Во продолжението од првото полувреме имаше шанси на двете страни, но мрежите мируваа.

Во вториот дел, клучниот потег го направи младиот, само 17-годишен Мартин Џангаровски, кој во 63. минута донесе двојна предност. Сепак, драмата брзо се врати, откако Сухејл Муарем пет минути подоцна намали на 2-1 и ја врати неизвесноста.

Гостите имаа можност да стигнат и до израмнување, но не ја искористија, па „лавовите“ успеаја да ја задржат предноста до крајот и да запишат триумф што може да се покаже како пресуден.

И покрај победата, тимот од Ѓорче останува на претпоследната позиција, но сега со 27 бодови, само еден помалку од Работнички и два зад Пелистер, кој моментално е над опасната зона. До крајот на сезоната остануваат уште четири кола: во следното коло Македонија ЃП гостува кај Шкупи, додека Работнички ќе се соочи со Пелистер во директна пресметка за опстанок.