Израелскиот претседател Исак Херцог денеска во својот говор на Светскиот економски форум во Давос предупреди дека Иран и милициите што ги поддржува ја загрозуваат глобалната стабилност.

„Постои зла империја која произлегува од Техеран која троши милијарди долари на оружје“, им рече Херцог на деловните и политичките лидери собрани во швајцарското зимско одморалиште.

Израел води војна „за слободниот свет“, рече Херцог.

„Да не постоеше Израел, Европа ќе беше загрозена, затоа што овие варварски џихадисти сакаат да нѐ извлечат сите нас од регионот. САД, исто така, би можеле да бидат следни на редот“, според израелскиот претседател.

Херцог истакна дека Иран „ги нападнал силите на САД“ пред неколку дена. Тој мислеше на Иранската револуционерна гарда, која истрела проектили врз цели во Ирак и Сирија претходно оваа недела. Очевидци изјавија дека неколку проектили паднале во близина на американскиот конзулат во изградба, но американските војници не биле погодени.

Иранската револуционерна гарда ја опиша целта во Ирак како шпионски центар управуван од израелската тајна служба Мосад. Херцог, исто така, ја пофали меѓународната коалиција која се бори против проиранските јеменски Хути, која беше формирана како одговор на повторените напади на бродови во Црвеното Море.

САД, Обединетото Кралство и другите сојузници започнаа серија напади против Хутите за да ги запрат нивните напади врз комерцијални бродови во еден од најпрометните теснеци во светот.

Хутите почнаа да напаѓаат меѓународни товарни бродови откако изби војна меѓу Израел и Хамас во Газа по смртоносните напади врз Израел на 7 октомври.

Хутите рекоа дека нема да запрат додека не заврши израелската воена офанзива во Газа и Палестинците не добијат хуманитарна помош.

Иран е единствената земја во светот која одржува официјални дипломатски односи со Хутите.