Во Ирак, една од земјите со најмногу изречени смртни казни во светот, денеска е егзекутирана група од 21 лице, обвинети за тероризам, соопштија полициски и медицински извори.

Сите егзекутирани се мажи кои се осудени за терористички акти што ги извршиле неодамна или пред неколку години. Сите се погубени со бесење во затвор во градот Насирија, во јужен Ирак.

Ирачките судови од крајот на 2017 година на смрт осудија неколку стотици лица, откако тамошните власти прогласија победа над џихадистите од Исламската држава.

Во оваа земја, во последните 20 години, најчесто нападите ги изведуваат радикалните сунити.