Постигнат договор: Џошуа и Фјури за апсолутен владетел на денешниот бокс!
Ентони Џошуа и Тајсон Фјури постигнаа договор за две меѓусебни борби кои треба да се одржат оваа година, пренесува „ЕСПН“.
Она што долго се чекаше е потврдено – двајцата најдоминантни борци во тешка категорија ќе имаат можност да ги одмерат силите, а само еден ќе биде апсолутен владетел на денешниот бокс.
– Потешкиот дел од работата е завршена. Постигнат е договор. Останува да видиме само за локацијата. Не верувам дека ќе биде тешко, бидејќи веќе имаме понуди од Блискиот исток, Азија, Источна Европа и САД – изјави Еди Херн, главниот промотор на Ентони Џошуа.
Џошуа ги држи титулите во организациите ВБА, ИБФ и ВБО, додека Фјури е сопственик на појасот во верзијата ВБЦ. Победникот од нивните борби ќе биде првиот неприкосновен шампион во тешка категорија по Ленокс Луис во 1999 година.
Tyson Fury and Anthony Joshua have agreed to a two-fight deal to unify the heavyweight titles, per @MarkKriegel
Both fights are expected to take place in 2021.
IT’S ON. pic.twitter.com/YvlS4qV79a
— Bleacher Report (@BleacherReport) March 15, 2021
Владимир Кличко беше најблиску до статусот апсолутен шампион во 21 век за време на импресивната серија, но во ниту еден момент не ги обедини сите четири најважни светски појаси, бидејќи во најголем дел од доминацијата на Украинецот, ВБЦ шампион беше неговиот брат Виталиј, кој сега е градоначалник на Киев.
Инаку, и Џошуа (31) и Фјури (32) доаѓаат од Велика Британија. Првиот во досегашната кариера има 24 победи (22 со нокаут) и еден пораз (од Енди Руиз јуниор), додека вториот е непоразен во 31 борба – 30 победи (21 со нокаут) и едно реми.