Православните христијани го започнаа божиќниот пост, кој ќе трае 40 дена – од 28 ноември до 6 јануари. Овој пост дозволува користење вино, масло за јадење и риба, па може да се каже дека не е толку строг како оној пред Велигден.

Доколку постите, ние ви пренесуваме интересен рецепт за ќофтиња од лосос, кои се одличен извор на протеини и добри масти.

Потребни состојки:

• 450-500 гр свеж лосос (без коски)
• 1 мал кромид
• 1 чешне лук
• лажичка сенф (околу 10 гр)
• 3-4 лажици лебни трошки или мелени бадеми (околу 30 гр)
• 1 лажичка сол и бибер
• масло за јадење

Подготовка:

Исечете го лососот на крупни коцки и ставете го во блендер. Потоа, додадете ситно сечкано чешне лук и крупно исечкан кромид. На крај, додадете го сенфот, солта, биберот и лебните трошки, односно мелените бадеми (по избор).

Измешајте убаво, сѐ додека не добиете еднолична смеса. Потоа, обликувајте ќофтиња од смесата и ставете ги на плех обложен со хартија за печење.

Оставете ги во фрижидер околу половина час да се стегнат малку, но доколку ви се брза, можете да го прескокнете овој чекор.

Пржете ги во загреана сува тава на средно висока температура околу 4-5 минути по страна. Лососот е мрсна риба, па ќе ги ослободи своите маснотии при пржењето. Но, доколку сметате дека треба – додадете неколку капки масло за готвење пред пржењето.

Послужете ги ќофтињата со свежа салата, а можете да направите и вкусни сендвичи со нив. Изборот е ваш.

Добар апетит!