Помагаат за депресија и анксиозност: Звуците од природата нѐ прават посмирени
Уште пред сто години, научниците заклучиле дека звуците од природата и зеленилото се тесно поврзани со опуштањето на човекот.
Едно неодамнешно истражување, објавено во медицинското списание „Саентифик рипортс“, уште еднаш покажа дека шумолењето на дрвјата, жуборењето на водата и црцорењето на птиците се звуци кои нѐ прават посмирени.
Со цел да ја испитаат врската помеѓу мозокот, телото и звуците околу нас, научниците тестирале 17 возрасни лица со магнетна резонанца додека слушале звуци од природата за време на испитувањето. Биле следени и отчукувањата на срцето и промените во состојбата на нервите, вклучувајќи ги и неволните функции, како што се дишењето, метаболизмот и варењето.
Резултатите покажале дека активноста на мозокот варира во зависност од звуците околу нас. Биле откриени и разлики во отчукувањата на срцето, иако мали, што укажува на смирување на невролошкиот систем во нашето тело.
Луѓето се поврзани со нивната природна средина. Природата ни помага визуелно, но и со своите звуци, да се опуштиме, да ги намалиме чувствата на анксиозност, стрес, депресија и меланхолија.
Науката докажа дека смирувачките звуци на природата помагаат во намалување на крвниот притисок, како и нивото на кортизолот, кој е познат како „хормон на стрес“.
И визуелните аспекти на природата можат да имаат смирувачки ефект врз нашето тело, особено ако се фокусираме на зеленилото. Тоа е еден начин да се фокусирате на релаксација и да ги пренасочите негативните мисли. Фокусирањето на нешто пријатно, како дрвја и зеленило, помага да се оттргнете од негативното размислување.
Научниците истакнуваат дека, во текот на еволуцијата, луѓето биле обучени да обрнуваат внимание на звуците кои се опасни и звуците кои се безбедни.
Истражувањето на Светската здравствена организација потврди дека луѓето кои живеат опкружени со зеленило, или во близина на парк или шума, имаат подолг животен век.