Вечерва околу 21 часот полиција прекинала свадба во угостителски објект во скопско Арачиново, дознава неофицијално Слободен печат.

Притоа интервенцијата полицијата во објектот биле затекнати околу 200 лица.

Свадбите и други семејни веселби и собирања се забранети од почетокот на епидемијата на ковид -19 во земјава, а за прекршителите на овие забрани ќе следуваат соодветни пријави и казни.

Засилените полициски и инспекциски контроли се за спречување на ширењето на коронавирусот кој циркулира и создава кластери при вакви големи семејни собири.

Попладнево министерот за здравство Венко Филипче уште еднаш апелираше до граѓаните да ги почитуваат мерките во текот на празничниот викенд:

-Групирањето, забавите, собиранките оставете ги за некое друго време. Има многу безбедни начини за убаво поминат викенд почитувајќи ги мерките за заштита. Сега е време да го заштитиме сопственото, а со тоа и јавното здравје- напиша Филипче.

Министерството за здравство информираше дека во последните 24 часа се направени 2634 тестирања, а регистрирани се 640 нови случаи на ковид-19. Во болнички услови починаа 12 лица.

Дванаесет пациенти починаа, нови 640 заразени со коронавирусот