Деновиве на социјалната мрежа фејсбук се појави реклама на која се гледа како човек држи заврзано, тажно куче од расата пит-бул, а на огласот пишува „Се продава (за борба) пит бук оригинал, може да се види во секој момент, 11 месеци“. 

Тоа што авторот на објавата не го открил е дека кучето се вика Бамби, која претходно била украдена од нејзините сопственици.

Тука настапуваат активистите од здружението за заштита на животни „Шепасти ентузијасти“, кои откако го здогледале огласот, веднаш изреагирале.

„По вчерашната објава за продажба на пит-бул за борби, веднаш изреагиравме и се договоривме со „продавачот” да го купиме. Знаевме дека ова е единствениот начин кучето да не заврши во погрешни раце.

„Агресивноста која многу често се припишува на овој вид раси е сосема спротивното од она што не пречека кога ја видовме. Најмилата девојка на свет не чинеше (само) 100 евра, трошоци кои ги подмиривме заедно со Ели.“, пишуваат од здружението.

Веднаш штом го откупиле кучето од продавачот, активистите го однеле на ветеринар, каде дознале дека кучето има свој чип, при што откриле дека истото се вика Бамби.

Сопствениците на Бамби цела година неуспешно трагале по својот најдобар пријател.

„Најважно од сѐ е тоа што рутинската контрола на ветеринар ни откри дека ова куче си има чип, па оттаму си го врати името – Бамби, а и сопственикот – Бојана. После цела година барање и агонија на сопствениците, тие конечно успеаа да си го пронајдат најдобриот пријател! На радоста и немаше крај…“

„Најважно од сѐ е тоа што рутинската контрола на ветеринар ни откри дека ова куче си има чип, па оттаму си го врати името – Бамби, а и сопственикот – Бојана. После цела година барање и агонија на сопствениците, тие конечно успеаа да си го пронајдат најдобриот пријател! На радоста и немаше крај…“

Активистите од „Шепасти ентузијасти“ апелираат секогаш да се чипираат милениците: „Се што треба е да не се откажувате никогаш! И да, секогаш чипирајте ги вашите миленици, затоа што тоа е единствениот начин тие да го пронајдат патот назад до вас, во вакви случаи!“.

Сопственичката на кучето јавно се заблагодари на активистите и објави фотографии како Бамби сега повторно ужива во топлината на домот.

Од здружението „Шепасти ентузијасти“ на социјалните медиуми напишаа дека случајот ќе биде пријавен во полиција.