Платини: Уште од првиот ден бев против ВАР технологијата!
Поранешниот претседател на европската фудбалска куќа (УЕФА) и натаму е против применување на ВАР технологијата во текот на мечевите.
Мишел Платини вели дека не треба да се судат фудбалските моменти преку гледање на видео снимките.
– Уште од првиот ден бев против ВАР технологијата, фудбалските моменти не треба да се судат преку гледање на видео снимките – рече Платини за „Ил Кориере дело Спорт“.
– Тоа не го кријам, телевизијата ја нарушува целата перцепција на индивидуалните спорни моменти. Фудбалот е спорт на физички контакти, има редовни интервенции кои доколку поминат преку ТВ и се забават, доведува до неприфатливи толкувања. Еден прекршок на теренот мора да се процени и биде суден во прав момент – додаде поранешниот француски репрезентативец.
Според Платини ВАР ја „убива“ возбудата за гол, го обврзува играчот да прослави пет минути подоцна, а понекогаш дури и двапати.
– За повеќе еднаков натпревар, ВАР не е потребен, туку ни се потребни подобри судии. Контроверзноста на технологијата не е само ограничена во Италија, туку и во Англија, Шпанија и Германија – вели Платини.
