Организаторот „Плакарт“ и 13-то издание на Скопје постер фестивал се приклучуваат на глобалното дизајнерско движење против ковид-19 со изложба на плакати со мото „Цврсто, сите заедно!“. Во организација на „Плакарт“ во галеријата на МКЦ ќе бидат изложени плакати од 75 светски дизајнери, од 56 земји од целиот свет, вклучувајќи ја и Македонија.

Целата иницијатива се реализира во соработка со „Постер територи“ од Калифорнија, Чешката асоцијација за графички дизајн, Московското биенале и реномираниот дизајнер Мирко Илиќ од Њујорк, познат на нашата публика како еден од најинспиративните дизајнери и стрип-уметници од бивша Југославија.

Исто така, ќе бидат претставени и студентски плакати кои се приклучија на иницијативата за давање гласност на мисијата на дизајнерите и уметниците. Дел од дизајнерите кои ќе бидат застапени на изложбата се: Јоси Лемел (Израел), Мирко Илиќ (Њујорк), Хавиер Борбола (Куба), Адек Сапутра (Индонезија), Петре Поч (Унгарија), Тирсо Цезар (Италија), Кристофер Скот (Еквадор), Луис Ривера (Бразил), Ерин Брајт (САД), Роберт Јанг (Велика Британија), Небојша Гелевски и Лазе Трипков (Македонија), Хитоши Мјура (Јапонија) и други.

Изложбата ќе биде поставена во Галерија МКЦ од 16 до 26 ноември. Проектот е поддржан од Министерството за култура.

(Текстот е објавен во „Културен печат“ број 56, во печатеното издание на „Слободен печат“ на 14-15 ноември 2020)