Пелистер им се врати на победите во АБА 2 лигата
Денеска славеа кошаркарите на Пелистер во АБА 2 лигата откако на вториот „балон“ во Сараево, Босна и Херцеговина, со 83:71 го совлада Осиек од Хрватска.
Тоа е веќе трета победа за битолчани во ова регионално натпреварување за моментно шесто место со седум бодови, само еден помалку зад водечкиот Хелиос Домжале.
За македонската кошаркарска екипа најефикасен беше босанскиот интернационалец Хаџифејзовиќ со 20 поени (седум скокови, четири асистенции).
На паркетот блескаше уште еден Босанец Врањеш, но на спротивната страна со 22 поени и осум скокови.
– Не би можел да го дефинирам денешниот меч во целост како кошаркарски натпревар, бидејќи имаше трчање, немаше кошарка од некое повисоко ниво. Тоа што е наш проблем од денешниот натпревар ќе оставиме да го разговараме во нашата соблекувална, а сепак сме радосни на победата и покрај ваков лош ден – рече тренерот на КК Пелистер, Марјан Илиевски, по мечот со Осиек.
Следниот дуел Пелистер ќе го има на 27 ноември против Горица од Хрватска која има четири порази.