Партиските кампањи на најјако, рејтинзите никогаш послаби
Власта го одбива упорното инсистирање на опозицијата за предвремени избори, а на терен дејствува со средства што досега се користеле, главно, во предизборието. И ВМРО-ДПМНЕ не прифаќа „не“ како одговор и постојано е на терен, на средби со граѓаните
Македонија е далеку од какви и да се избори, но најголемите политички партии се однесуваат како да ќе се гласа на крајот на октомври и ги преплавија граѓаните со секојдневни прес-конференции, соопштенија, „откривање скандали“, меѓусебни обвинувања и кавги со навреди од собраниската говорница.
Следното редовно отворање на гласачките кутии во Македонија се очекува во пролетта 2024 година, кога е терминот за претседателските избори, а според најавите на владејачката СДСМ, најверојатно истовремено ќе се одржат и парламентарните избори, чиј редовен термин е во летото 2024 година.
Опозициската ВМРО-ДПМНЕ веќе цела година бара итни предвремени парламентарни избори. Притисокот почна лани, по поразот на СДСМ на есенските локални избори, а продолжи летово, за време на расправата по „францускиот предлог“ и протестите на граѓаните против бугаризацијата на Македонија. Превирањата има во најголемата партија на Албанците ДУИ, која е дел од власта. Цел на нападите на незадоволните во ДУИ е вицепремиерот Артан Груби.
Власта ни да чуе
Власта не сака ниту да слушне за упорното инсистирање на опозицијата за предвремено избирање пратеници и ги одбива со наратив дека сега не е време за гласање, туку за консолидација и работа, за да се преброди тешката зима што претстои во услови на силна економска и енергетска криза, како и дека парламентарното мнозинство е стабилно.
На терен, пак, СДСМ се однесува сосема поинаку и користи средства што досега биле карактеристични, главно, во предизборието: води црна кампања против лидерот на опозициската ВМРО-ДПМНЕ Христијан Мицкоски и го напаѓа со телевизиски спотови, билборди и со летоци.
И ВМРО-ДПМНЕ се однесува слично – не го прифаќа одговореното „не“ од СДСМ и тера своја кампања, односно го напаѓа премиерот Димитар Ковачевски со афери, а на терен се среќава со граѓаните.
Црната кампања, пак, ниту на едната, ниту на другата партија не им донесе повисок рејтинг и повеќе гласачи, а комуниколозите досега многупати предупредија дека со негативниот напаѓачки дневнополитички наратив, најголемите партии ќе доживеат голем одлив на гласовите. Тоа го покажа и последната анкета на ИПСОС од летово, според која паѓаат рејтинзите на големите партии (ВМРО-ДПМНЕ 19,7 отсто, СДСМ 9,5, ДУИ 6,2 Левица 5,9, Алијанса за Албанците 2,8 отсто, други 4,2), а на повеќе од половината избирачи не им се допаѓа актуелната политичка понуда, па 22,5 отсто не одлучиле, 17 отсто одбиле да одговорат, а 12,2 отсто воопшто не бил гласале.
Атанасоски: Ужасна политичка некултура на политичките елити
Според аналитичарите, граѓаните ќе ги фаќа сè поголема политичка апатија, сè додека партиите се однесуваат по утврдениот модел, со кој наводно си нудат помош, а истиот ден го злоупотребуваат на најперфидни начини.
Аналитичарот и политиколог Благојче Атанасоски нотира дека по повеќе од 30 години откако го напуштивме еднопартискиот систем и го заменивме со плурален, тој од година на година сè повеќе се дегенерира.
„Ние сме сведоци на сè пониска и пониска, би рекол, ужасна политичка некултура на политичките елити и кај спротивставените политички актери. Наместо како што се доближувавме до евроатлантските интеграции, така и да се постигнува нивото на политичка култура и актерите да созреваат, ние овие денови сме сведоци на најдолен и најцрн вид оцрнување на политичкиот противник. Сето ова на наредните избори ќе резултира со рекордно низок одзив на граѓаните и тие ќе апстинираат, бидејќи се заситени од дното што им го сервираат лидерите на мејнстрим големите политички партии. Наместо привлекување на неопределените, ние ќе гледаме и намалување на традиционалните гласови за партиите, бидејќи сите до еден, без исклучок сме уморни од ова примитивно и под секое човечко достоинство поведение на власта и опозицијата“, вели Атанасоски за „Слободен печат’“.
Во врска со случувањата во ДУИ, тој смета дека по 20 години практицирање власт, нормално е да се појави група и структура што е незадоволна од внатрешните состојба.
„ДУИ постои само за да владее. Испразнета е од суштина, од идеологија, од цел и мисија. Најверојатно зад овој судир се крие прераспределбата на моќта, парите, тендерите и привилегиите, а во јавноста се прикажува како некое „незадоволство од функционирањето на партијата и партиските органи“. Во тоа, ретко кој верува“, смета Атанасоски.
Тој додава дека на македонската политичка сцена се случува „еден тип на тешка декаденција, дегенерација и назадување, наместо прогрес, култивирање и цивилизираност, како што доликува на членка на НАТО и земја што треба да ги почне преговорите со ЕУ“.