Илјадници Палестинци денеска учествуваа на „Денот на бесот” ширум целиот окупиран Западен Брег, протестирајќи против одлуката на американската администрација дека изградбата на израелски населби на палестинска територија не е нелегално.

Дел од демонстранти се судрија со израелските безбедносни сили. Учесниците во протестот во Рамалах палеа фотографии од американскиот претседател Доналд Трамп, а исто така беа запалени и американското и израелското знаме.

Демонстрантите носеа транспаренти на кои пишуваше „Импичмент за Трамп, затвор за Нетанјаху, окупацијата ќе се помине, а ние ќе останеме на наша земја”.

Палестинците фрлаа со камења врз контролните пунктови во близина на Рамалах, Витлеем и Хеброн, а припадниците на израелските безбедносни сили возвратија со солзавец.

Поради протестот затворени се училиштата, факултетите и владините објекти во Западен Брег.
Администрацијата на американскиот претседател Трамп минатата недела по четири децении соопшти дека израелските населби на палестинските територии не претставуваат кршење на меѓународното право.

Повеќе од 400.000 еврејски доселеници сега живеат во Западен Брег, територија освоена од Израел заедно со Источен Ерусалим во војната во 1967 година.

Меѓународната заедница и Палестинците тврдат дека еврејските населби се нелегални и го попречуваат формирањето на палестинска држава. Израел тврди дека судбината на населбите најверојатно ќе се решава на преговарачка маса.