Велешанка Пале Илоска (23), која во самоодбрана го уби својот невенчан сопруг, ја издржува мерката домашен притвор што ѝ беше изречена, без елементарни услови за живот, во празна куќа, без струја и огрев.

Додека била отсутна од куќата во која живее, во неа провалиле крадци. Според нејзините роднини, украдено е сè што можело да се однесе, собите се празни. Крадците дури се обиделе да го украдат и клима-уредот, но тогаш некој од соседите ги забележал и повикал полиција.

Таа живее сама во трошната куќа, наследена од починатиот татко, каде што живеела со сега починатиот Александар и каде што лани во септември се случи трагичниот настан. Згора на сè, во куќата нема струја, зашто е исклучена поради неплатен долг од околу 40.000 денари.

– Пред трагедијата Пале работеше во странска фабрика во Кавадарци. Сега, по настанот, нема повеќе примања и е препуштена сама на себе. Кражбата е уште еден удар врз неа во целата ситуација. Роднини ѝ однесоа дрва, се трудат да ѝ помогнат колку што можат, но тоа не е доволно. И покрај сè, таа е многу силна и никогаш не била од оние луѓе што се жалат – велат роднините на Илоска за „Слободен печат“.

На фејсбук-страницата „Национална мрежа против насилство врз жените и семејно насилство“ осамна објава за состојбата на Илоска, преку која се апелира од граѓаните да ѝ помогнат. Граѓанските организации исто така остро реагираат на одлуката на Основното јавно обвинителство Велес, кое поднесе обвинителен предлог во кој таа се товари за кривично дело „убиство на миг“, а не за убиство при нужна самоодбрана, како што сметаат тие. Тие велат дека целиот случај бележи низа пропусти од институциите.

– Институциите уште од самиот почеток не го применуваат принципот на должно внимание. Кон сега обвинетата постапуваат како со лице за кое постои основано сомнение дека извршило кривично дело, а не како лице жртва кое се нашло во неизбежна борба за заштита на својот живот. Бараме Илоска да биде ослободена за кривичен прогон, односно ОЈО Велес да го повлече обвинителниот предлог и судот да донесе одбивателна пресуда. Одлуката на правосудните органи во овој случај несомнено ќе го одрази и нивото на општествена свест, а ќе зависи и понатамошното охрабрување на жртвите за пријавување насилство врз жените и семејно насилство – велат од Националната мрежа.

Според обвинението, Илоска се товари дека го убила својот свршеник Александар Р., инаку полицаец, откако тој пијан ја тепал, ја влечел за коса по подот и ја навредувал со најпогрдни зборови. Во еден момент во кујната тој почнал да ја дави, но таа успеала да дофати нож од масата и да го прободе во градите, по што тој за кратко време умрел.

ИНФОГРАФИК | ОJO бара велешанката Пале да одговара за убиство, иако била тепана од убиениот маж со кој живеела