Две лица загинаа како последица на силниот ветер и врнежи од дожд и снег во централните и во источните делови на Бугарија.

Маж загинал во Софија откако врз неговото возило паднало дрво, на булевар во центарот на градот, а од откорната гранка загинала и жена во Варна.

Во овој град на брегот на Црно Море е прогласена вонредна состојба. Градските власти побараа од жителите да не излегуваат, освен во итни ситуации. Ветрот со брзина над 125 километри на час корнел дрвја и парчиња од фасади и покриви. Квартовите Аспарухово и Галата, како и други реони од градот останале без струја.

Аеродромот во Варна останал отворен, но многу летови се откажани или одложени. Патните делници од Варна кон Добрич и кон Русе биле непроодни поради снежни наноси, поради што многу возила останале блокирани.

Пожарникарски екипи реагирале и во Шумен, Добрич, Разград и во Бургас.