Една од најважните препораки за заштита од ковид-19 е темелното и често миење на рацете со сапун барем 20 секунди. Меѓутоа, ако ви е потребна подобра демонстрација за тоа, Центарот за големи мајмуни од Флорида има соодветно видео.

Снимката од орангутанката Сандра стана вистински хит на социјалните мрежи бидејќи таа се научила да ги мие раце.

Сандра била снимена како ги мие рацете, а од центарот велат дека орангутанката ги видела своите негуватели како го прават тоа, па започнала и таа.

„Дефинитивно ги триеше рацете подолго од 20 секунди, одлично завршена работа, Сандра“, напишале од центарот покрај симпатичното видео.

Снимката стана хит на социјалните мрежи, а многумина ѝ заблагодаруваат на Сандра за примерот што им го дава на луѓето што не ја практикуваат оваа најважна заштитна мерка – редовно и темелно миење на рацете.

Во јануари орангутанката го прославила својот 34-ти роденден, а негувателите по тој повод ѝ приредиле забава.