Битолското обвинителство се огласи околу разработената шема на измами на граѓани со телефонски повици за лажни сообраќајни несреќи. Случаите се поврзуваат со телефонски броеви од Романија, велат од Обвинителството.

Во последните два-три месеци во Битола и околината биле измамени над десет граѓани, од кои биле извлечени вкупно над 60.000 евра и други вредни предмети. Бројот на вакви настани особено се зголемува од почетокот на февруари, од кога се евидентирани веќе шест слични случаи.

„Во сите предмети начинот на извршување е сличен. Оштетени се обично повозрасни лица кои добиваат телефонски повик дека некое ним блиско лице е тешко повредено во сообраќајна несреќа и дека итно се потребни пари за сложена операција. Втората верзија на лажни факти која измамниците им ја претставуваат на дел од оштетените е дека нивен близок предизвикал сообраќајна несреќа со тешки последици и дека парите се потребни за да се избегне затворска казна“, соопштуваат од ОЈО Битола.

Оштетените биле доведени во заблуда и исплашени за своите блиски, па се согласувале лично на рака да исплатат различни суми пари – од неколку десетици илјади денари до над 20.000 евра, златен накит и вредни предмети. Парите жртвите им ги предавале на различни локации во Битола, на луѓе кои измамниците ги ангажирале преку оглас на Фејсбук. Тие луѓе потоа со парите оделе во Бугарија и таму му ги предавале на „мозокот“ на измамата, велат од ОЈО. До овој момент Обвинителството поднело обвинение само против четворица од овие помагачи на измамниците, кои се гонат како соизвршители.

Жена прегазена на улица во Карпош – возачот избегал, но полицијата го пронајде