Повеќето наставници, но и родители го сметаат за успешно првото тримесечје со онлајн настава, кое е „заклучено“ и со оценувањето на далечина. Иако периодот за оценување на основците и на средношколците, за разлика од минатите години кога учебната година почнуваше на 1 септември, беше покус, оценките се формирани заклучно со 20 ноември.

Иако имаше можност дел од учениците за кои наставникот ќе смета дека е потребно да се оценат „во живо“ да бидат повикани во училиште, во најголемиот дел од училиштата оценувањето беше онлајн.

– Сите ученици се оценети. Ставивме оценки, одржавме совет, а во текот на неделата ќе имаме и родителска средба преку платформата Тимс. Ќе им бидат испратени евидентни листови за оценките на учениците. Оценувањето во најголем дел помина онлајн – вели наставничката по македонски јазик Билјана С. Дивјаковска.

Дивјаковска додава дека повеќето ученици интернетот веќе почнале да го користат и како извор за дополнително истражување на темите од наставата.

– Презадоволни сме од учениците, активни се на часовите, интернетот им помага во текот на часовите, истражуваат, редовно ги извршуваат обврските – задоволна е Дивјаковска.

Учениците што немаат технички уреди, наставата ја следат на ТВ-екраните или наставниците им испраќаат печатени материјали. Тие биле оценувани преку тестови, кои ги одговарале дома.

– Најважно е здравјето, затоа не се инсистираше на оценувањето во живо – заклучи Дивјаковска.

Состојбата е слична и во дел од средните училишта во земјава. Елвира Мустафа, професорка по етика и филозофија во средното училиште „Никола Карев“ во Скопје, исто така е задоволна од тоа како поминало онлајн оценувањето.

– Самиот процес на оценување, најмногу зависи од пристапот на наставникот, односно како тој тоа ќе го организира и реализира. Главно, задоволни сме од одговорите на учениците – истакна Мустафа.

Нормално е дека проверката на знаењето „во живо“ би била пореална, но додека вирусот се шири со ова темпо, подобро е учениците да бидат оценети исто како што ги слушаат предавањата, на далечина – смета Дејан Велков, родител на ученик од шесто одделение во Основното училиште „Блаже Конески“ во Скопје.

– Вирусот е опасен, ситуацијата не е добра за никого. Моето дете го помина процесот на онлајн тестирање и можам да кажам дека помина добро. Сега е најважно да се намали ризикот од заразата – додаде Велков.

Оценувањето на овој начин мора да продолжи барем до крајот на оваа година, смета друг родител, кој сакаше да остане анонимен, а чиј ученик е средношколец што следи онлајн настава.

– Мораме да продолжиме со оваа динамика најмалку до крајот на оваа школска година, иако никој не знае како ќе биде и следната. Најголем императив треба да е здравјето на децата – вели овој родител.

Царовска: Распустот ќе трае од Нова година со 21 јануари

Бројот на заразени ученици и наставници во наставата со физичко присуство во целата држава е помалку од 1 процент, па затоа барањето на опозицијата за предвремен зимски распуст се неоправдани, изјави министерката за образование и наука, Мила Царовска.

– Во моментов, активни ученици со физичко присуство се 79, што е 0,06 проценти од вкупниот број ученици, и 148 наставници до вчера, што е помалку од 1 процент од вкупниот број наставници во нашата држава. Ова се факти што зборуваат дека интерно ширење на вирусот во училиштата нема, дека образовниот систем е стабилен и училиштата ги почитуваат мерките и здравствените протоколи. Токму затоа продолжуваме да го спроведуваме Планот од Владата за учебната 2020/2021, според кој второто полугодие ќе почне на 21 јануари, а на крајот на годинава ќе заврши првото полугодие – рече Царовска.