Човекот обвинет за нападот на парадата на Денот на независноста во предградието на Чикаго, ја купил својата пушка легално, испукал повеќе од 70 куршуми од покривот и се облекол во женска облека за потоа да се вклопи во толпата која бега, соопштија локалните власти.

Осомничениот, 21-годишниот Роберт Е. Кримо III, беше приведен во понеделникот откако и се предаде на полицијата, неколку часа по нападот на парадата на 4 јули во Хајленд Парк, Илиноис, во кој загинаа шест лица, а повеќе од 30 луѓе беа ранети.

Официјални лица на брифинг со новинарите рекоа дека тој го планирал нападот неколку недели, а властите сè уште размислуваат каква кривична пријава да поднесат. Не беше јасно дали Кримо има адвокат.

Кримо има карактеристични тетоважи на лицето и се чини дека носел женска облека за да го прикрие својот идентитет, изјави за новинарите Крис Ковели, портпарол на канцеларијата на шерифот на округот Лејк.

„Тој се вклопи директно со сите други додека тие трчаа наоколу, речиси како да е и невин гледач“, рече Ковели. Осомничениот побегнал во куќата на неговата мајка во близина, а подоцна го позајмил нејзиниот автомобил.

Официјални лица рекоа дека не знаат кој бил мотивот за пукањето во населба со доминантно еврејско население, но немале докази дека има некаква антисемитска или расистичка основа. Инспекторите ги прегледувале видеата што тој ги направил исполнети со насилни слики.

ФОТО+ВИДЕО | Пукање на парада за Денот на независноста на САД