Европските „сили за брза реакција“, кои вчера ги спомна францускиот претседател Емануел Макрон и кои ќе бидат наменети за операции како што е евакуација на граѓани од земји во криза, може да ја здогледаат светлината на денот веќе следната година, изјави францускиот министер за вооружени сили Себастиен Лекорну, цитиран од француските медиуми.

-Ова е клучно прашање за кое се надевам дека ќе успееме да донесеме заклучок веќе следната година, со тоа што ќе бидеме многу одговорни и многу брзи, рече Лекорну во интервју за телевизијата Франс 2.

Министерот го оправда проектот со фактот дека има „многу кризи во кои НАТО не е надлежен и во кои Франција често спроведува операции сама“, давајќи го примерот со евакуацијата на граѓаните од Судан минатата година.

За време на операцијата во Картум беа евакуирани 1.000 лица, од кои 200-250 беа Французи. Во исто време, „создадовме голем воздушен мост со (авионите на Ербас) А400М, со бродови. Така се случи Франција да биде практично сама“, нагласи Лекорну.

-Сосема е природно овој товар, што „има своја цена, вредност“, да се подели, рече францускиот министер.

Овие сили за брза реакција „кои ќе ја осигураат безбедноста на европските граѓани, португалските, италијанските, германските и француските граѓани, мора да можат да се создадат многу брзо“, кажа министерот, истакнувајќи дека нивното создавање е прашање на прагматизам.