Ново Мексико денес стана првата американска држава што нуди бесплатна грижа за деца за сите жители, во обид да се поттикне економијата и да се подигне нивото на образование и заштита на децата, за што е рангирана најниско во Соединетите Американски Држави. Според новата програма, семејствата, без оглед на приходите, можат да добијат владини ваучери за покривање на трошоците за грижа за деца, без разлика дали се во јавни или приватни институции, објави Ројтерс.

Мерката е кулминација на напорите на владата на Ново Мексико од создавањето на Одделот за образование и грижа за деца во раното детство во 2019 година. Овој потег доаѓа во време кога другите држави и градови предводени од демократите разгледуваат слични мерки, популарни кај работничките семејства.

Конектикат неодамна воведе закон со кој ќе им се овозможи бесплатна грижа за деца на семејствата што заработуваат помалку од 100.000 долари годишно, додека за оние со повисоки приходи, износот е ограничен на седум проценти од вкупниот приход.

Кандидатот за градоначалник на Њујорк, Зохран Мамдани, исто така предложи универзална, бесплатна грижа за деца, објави Танјуг- пренесе Политика.

За да се спроведе најновата мерка, властите на Ново Мексико ќе мора да вработат уште 5.000 воспитувачи и да отворат уште 14.000 објекти за деца, соопшти локалната самоуправа, која ја водат демократите. Американската држава ќе создаде фонд од 12,7 милиони долари за изградба и проширување на објекти за деца, објави Ројтерс.