Во ситуација кога претседателот на државата прогласи вонредна состојба а потоа и ја продолжи една од клучните работи е Собранието да работи, бидејќи во моментов владата е техничка и е исклучиво формирана за спроведување на избори, се доведе во една ситуација во која треба да се постапува во околности на „виша сила“. Е сега техничката Влада се доведе во ситуација да носи одлуки, а Собранието како Законодавен дом треба да врши контрола врз работата на оваа техничка влада.

-Собранието има најголем легитиметет во моментот. Ако имаме техничка влада за спроведување на избори, Собранието има право согласно Устав, Деловник и Закон за Собрание да се свика и да заседава, изјави за „Утрински брифинг“ на „Слободна ТВ“ Александар Новаковски, поранешен претседател на ДИК и адвокат, околу улогата на Собранието во вакви моменти на криза.

Пратениците се професионално вработени, а со тоа и мандатот им трае до изборот на нови пратеници.

-Правото треба да се гледа пошироко, а не како што го гледаше Уставниот суд вчера. Мандат пратениците имаат се уште, тој трае до изборот на новите пратеници. Од 2003 година парламентот е професионален и сите пратеници се професионално вработени. Во ниту еден акт не стои дека со денот на распуштање на Собранието се прекинува мандатот. Мислам дека сегашните ставови се од дневно политичка природа. Пратениците уживаат уште имунитет? Уживаат. Ги користат уште пратеничките права? Ги користат. Значи претседателот на Собранието уште на почетокот излезе со став дека нема да го свикува Собранието, сега не сака да отстапи, бидејќи можеби така го советувале во моментот кога се побарало од него пред два месеци. Но сега имаме променети околности. Сега имаме техничка Влада, се прошири рокот за пандемијата, се одложија изборите, изборната комисија ја ставија во ситуација да носи заклучок за мирување на дејствијата, а ден пред тоа ги потврдија листите. И не може никој да ме убеди дека партиите немаат свои интереси и дека калкулираат со датумот на избори вели Новаковски.

Носење на одлуки за политички поени, опозицијата која не го признаваше Џафери за претседател на Собранието, сега ги оправдува неговите постапки.

-Ова што се случува не е во ред. Техничката Влада носи уредби кои треба овој Парламент да ги контролира, да ја потврди вонредната состојба. Јас сум поборник за брзи избори. Ја оставија ДИК да носи некои одлуки за кои треба да се размисли дали има право. Државите од ЕУ кои имаат помалку економски проблеми велат дека ние ќе имаме воена економија подоцна, а ние имаме техничка влада на која може да и се продолжи мандатот, а Собранието како законодавен орган не може да се свика. Тука нема правна логика. Претседател на Собранието кого не го признаваа, зборувам за опозицијата, сега наеднаш ги оправдуваат неговите потези, го признаваат. Во нашава држава, сите секогаш ги носат одлуките на дневно-политичките потреби. Техничката Влада во моментов има помал легитимет и едниствен орган кој може тоа да го потврди е Собранието и претседателот на државата, додава Новаковски.

Собранието ќе мора да се свика за одредување на датум за избори.

-Кога и да се случат следните избори, неминовно ќе биде да се свика Собранието. Ние имаме дека одлагање на изборите е одлука на Собранието. Собранието не е претседател на Собранието, туку сите пратеници. Доколку се создадат услови за избори, кој ќе го одреди датумот? На лидерска средба? Тоа ли ќе е легитимно? Не. Ќе мора Собранието, а неговиот претседател ќе мора да донесе одлука за одржување на изборите, бидејќи ДИК нема никакви овластувања да го одреди датумот, вели Новаковски.