Македонскиот голман Мартин Томовски продолжува да блеска во дресот на Битигхајм и со дури 20 интервенции беше клучната фигура во победата над Крефелд и уште еднаш покажа дека е во феноменална форма.

Македонскиот репрезентативец сосема заслужено се најде во тимот на колото. Благодарение и на неговите настапи, Битигхајм се држи на делба на второто место во втората Бундес-лига и сериозно конкурира за пласман во германската ракометна елита.

Статистиката по првите 11 кола покажува дека Томовски доминира речиси во сите голмански категории. Има најмногу одбрани (120) и убедливо најдобар процент на успешни интервенции (36,3%), оставајќи го зад себе Бохман од Хаген со 32,6%.

Тој е на врвот и по бројот на одбранети седмерци (10), а со постигнати два гола и четири асистенции го дели првото место меѓу голманите и во овие статистички сегменти.

Преземено од: Спорт.ком.мк