Поглаварот на МПЦ-ОА, г.г. Стефан ги забранил црковните погреби за време на празнувањето на Свети Никола и правилото почнува да се применува од оваа година. Починатите од сабота, недела и од понеделник ќе се погребуваат со црковните обреди во вторник, пренесува „А1он“.

Скопската епархија потврдила дека нема погреби за време на празнувањето на Св. Никола, но оттаму посочуваат дека верниците ќе треба да ги одложат погребите и за време на Божиќ и Велигден.

По барање на целокупното свештенство од Скопската православна епархија, а за што се известени и директорите на АД ‘Бутел’ – Скопје, архиепископот охридски и македонски, г.г. Стефан дал благослов на денот на празнувањето на Св. Никола да не се извршуваат погребенија, пракса што Црквата ќе ја применува и за саботните задушници, како и за празниците Божиќ и Велигден, кусо објаснуваат за „А1он“ од Скопската православна епархија.

Од управата на Градските гробишта „Бутел“ неофицијално појаснуваат дека забраната се однесува на верските обреди поврзани со погребите, а не и на самиот чин на погребување. Доколку некој реши, погреб може да се организира, вклучително со изложување на починатиот во капела, но нема да има поп. Нивните служби се достапни за граѓаните без прекин во текот на целата година.