Во организација на УЕФА и Фудбалската федерација на Македонија во Скопје се одржува првата регионална конференција за пиротехника. Денеска и утре на конференцијата во хотел „Хилтон“, присутни се вкупно 120. учесници, меѓу нив како предавачи интернационални експерти на темата кои ќе го пренесат своето знаење и искуство на присутните гости од нашата држава и Асоцијациите од регионот, Србија, Косово, Црна Гора и БиХ.

Важноста на овој настан за нас, но и за УЕФА ја потврди и срдечниот поздравен говор на Михаел Ван Праг, член на Извршниот комитет на УЕФА и претседател на Холандската фудбалска Асоцијација.

– Во име на УЕФА и нашиот претседател, Александар Чеферин изразувам благодарност до Фудбалската федерација на Македонија за заедничкото огранизирање на оваа важна конференција. Нашата одговорност е да се обидеме да најдеме правилен метод за соочување и справување со овие проблеми, бидејќи голема е загриженоста од зголемувањето на нивото на инциденти на фудбалските натпревари, а безбедноста на навивачите и љубителите на фудбалот секогаш е на прво место. Ние знаеме дека секоја држава или федерација на различен начин се справува со овие предизвици и драго ни е што денеска и утре ќе ги слушнеме и размениме методите кои во иднина можат да ни бидат од заедничка корист – рече високиот гостин на УЕФА, Михаел Ван Праг.

Претседателот на Фудбалската федерација на Македонија, Муамед Сејдини оствари средба со Ван Праг. Зборуваа и околу фудбалското пријателство меѓу двете држави и просторот за идна соработка.

– Ние како Фудбалска федерација на Македонија секогаш ја отвораме својата врата за нашите спортски пријатели, а Ван Праг секако е наш соработник и пријател. Разговаравме околу конференцијата која заеднички ја организираме и важноста околу безбедноста и интегритетот на фудбалот. Со Ван Праг споделивме искуства поврзани со младите национални репрезентации, фудбалските академии и женскиот фудбал и верувам дека имаме простор за поголема соработка во иднина. Оваа средба беше прв чекор кон таа насока. Му се заблагодарувам на г. Ван Праг за неговото присуство во Скопје и се радувам на продлабочувањето на добрите односи со УЕФА – се зборовите на претседателот на ФФМ, Муамед Сејдини.

– Заедно со полицијата ги преземаме сите мерки за спречување на употребата на пиротехника, нотреба поголема вклученост и на федерациите, дисциплинските органи, клубовите, па дури и надлежните судови бидејќи се загрозува безбедноста на навивачите и учесниците. Треба да сфатиме дека не постои сигурна употреба на пиротехника внатре на стадионите.Јас сум убеден дека по завршувањето на оваа конференција, споделувањето на искуствата и предизвиците со кои се соочувате, ќе бидат од голема корист за сите и ќе имаме многу појасна слика за тоа каде да се насочиме и кој средства да ги употребиме во решавањето на одделни проблеми – вели во дел од својот говор генералниот секретар на ФФМ, Филип Поповски.