Костадин Костадинов, член на ИО на СДСМ и актуелен градоначалник на Струмица, пред почетокот на состанокот на Извршниот одбор во седиштето на партијата изјави дека не би било принципиелно да шпекулира со имињата предложени за членови на влада пред тие да бидат соопштени во телата и органите на партијата.

За својот став рече дека ќе го каже „јасно и гласно и на Извршниот и на Централниот одбор“, а со сигурност останува на ставот дека не е заинтересиран за владина функција.

Прашан од новинарите дали имињата кои се споменуваат се прифатливи за голем дел од членството, Костадинов нагласи дека нема да коментира ништо пред тоа да ги слушне официјално на ИО и на ЦО.

– Јас сум сигурен дека има капацитетност новото лидерство на партијата пред ИО и ЦО да го понуди најдоброто за партијата и за државата во моментов, изјави тој.

Одговарајќи на новинарско прашањекакви луѓе ѝ се потребни на оваа влада, Костадинов потенцира дека тоа се „луѓе кои ќе бидат посветени исто како што беа посветени и кадрите досега“.

На прашањето дали има консензус во партијата, посочи дека затоа се и на Извршниот и на Централниот одбор, за да го постигнат консензусот, нагласи, и да ги изнајдат најдобрите решенија за државата.