Шпанскиот тенисер пред стартот на Мастерсот во Рим за прв пат ги коментираше случувањата на УС Опен кога Новак Ѓоковиќ заработи дисквалификација поради удирање линиски судија со топче.

– Навистина ми е жал за него. Му се укажа одлична можност да дојде до уште една грен слем титула. Знаеме дека такви работи не треба да се прават, но несреќни работи едноставно се случуваат – изјави Надал.

Надал поради безбедносни причини ги прескокна турнирите во САД, Мастерс Синсинати и УС Опен и остана во Шпанија да се подготвува за турнирите за земја. Токму Мастерсот во Рим ќе биде прв турнир на кој Надал ќе настапи по пауза од седум месеци која беше предизвикана од пандемијата на коронавирусот.

Потоа ќе настапи на Ролан Гарос каде исто како и во Рим, ќе ја брани титулата. Прв противник во Рим ќе му биде полуфиналистот од УС Опен, Пабло Карењо-Буста.
– Се чувствувам одлично, но постои доза на нервоза бидејќи долго време не се натпреварував. Карењо во Европа доаѓа по одлично одиграниот турнир во Њујорк, но сигурно е дека нема да му биде лесно да се адаптира на земјениот терен. Очекувам тежок дуел – рече Надал.