Во пресрет на состанокот со германскиот канцелар Фридрих Мерц, 60 големи компании го објавија создавањето на иницијативата „Направено за Германија“. Според нивната изјава, членовите на иницијативата заеднички ќе инвестираат 631 милијарда евра во Германија во текот на следните три години, вклучувајќи планирани и нови капитални инвестиции, трошоци за истражување и развој и обврски од меѓународни инвеститори, објави ДПА.

Канцеларот Фридрих Мерц го нарече настанот „една од најголемите инвестициски иницијативи во Германија во последните децении“ за време на деловниот состанок на високо ниво“. Како дел од неговите напори за пресврт на германската економија, Мерц се фокусира на создавање попривлечни услови за значително зголемување на деловните инвестиции во Германија.

Јавните инвестиции во голем обем можат значително да се зголемат со дополнителен приватен капитал, рече конзервативецот по средбата со претставници на иницијативата во која учествуваат неколку корпорации во канцеларијата во Берлин.

„Сакаме да го ослободиме овој потенцијал и со тоа да предизвикаме понатамошни ефекти на раст“, рече Мерц, додавајќи дека истовремено мора да се спроведат и структурни реформи за да се создадат подобри услови.

Иницијативата „Направено за Германија“ вклучува 61 голема компанија од различни сектори и инвестициски компании кои планираат да инвестираат 631 милијарда евра во Германија до 2028 година.

Меѓу иницијаторите се извршниот директор на Дојче Банк, Кристијан Сивинг, извршниот директор на Сименс, Роланд Буш, извршниот директор на медиумската група Аксел Спрингер, Матијас Депфнер и Аксел Гајзер, извршен директор на ФГС Глобал. Според германскиот национален радиодифузер АЕРД, на состанокот учествуваа околу 30 компании, вклучувајќи повеќе од десетина компании од ДАКС, пренесува БТА.