На Клоп теренот му е виновен за ремито против Фулам

Менаџерот на Ливерпул, Јирген Клоп/фото: EPA-EFE/Andrew Yates

Главниот конкурент на Манчестер сити за титулата во Премиер лигата, екипата на Ливерпул, новата сезона ја започна со изненадувачко реми од 2:2 на гостувањето кај Фулам.

Иако минатата недела, Ливерпул со 3:1 го победи Манчестер сити во „Комјунити шилд“, денеска во два наврати имаше негатива против повратникот во Премиер лигата и израмнувачкиот гол го постигна во 80 минута.

Менаџерот на „црвените“, Јирген Клоп вината за ремито ја најде во лошиот терен на „Крејвен Котиџ“ стадионот во Лондон.

– Освоивме бод во многу лош натпревар од наша страна. Нашиот став на почетокот од натпреварот не беше добар, а потоа сакавме да возвратиме, но не беше лесно бидејќи теренот беше сув. Резултатот е добар и мислам дека не заслуживме повеќе од еден бод. Можевме и да победиме, но тоа ќе беше премногу – изјави Клоп.

Менаџерот на Фулам, Марко Силва, пак е задоволен од резултатот но и од играта на двојниот стрелец Александар Митровиќ.

– Имав доволно време да се уверам во квалитетите на Митровиќ, тој не постигнува само голови туку и работи за тимот и тоа го прави фантастично. Го тера противникот постојано да биде под притисок – изјави Силва.

Видео на денот