На Филолошкиот факултет „Блаже Конески“ се одржа палимпсестен портрет на академик Луан Старова
Меѓународна научна конференција на тема „Луан Старова – писател и истражувач“ се одржа на 8 ноември на Филолошкиот факултет „Блаже Конески“ во Скопје, на која беа изложени повеќе реферати посветени на книжевната, научноистражувачката и дипломатската дејност на академик Луан Старова (1941-2022).
Домаќини на конференцијата беа Филолошкиот факултет „Блаже Конески“ при УКИМ, Катедрата за албански јазик и книжевност и Катедрата за романски јазици и книжевности. На тема „Луан Старова – писател и истражувач“ беа изложени поздравни говори и научни реферати на триесетина научници од областа на книжевноста.
На свеченото отворање на конференцијата, поздравна реч одржа проф. д-р Биљана Ангелов, ректор на Универзитетот „Св. Кирил и Методиј“, а со поздравни говори се обратија и проф. д-р Владимир Мартиновски, декан на Филолошкиот факултет, проф. д-р Исмет Осман, раководител на Катедрата за албански јазик и книжевност, проф. д-р Јоана Хаџи Лега, раководителка на Катедрата за романистика, беседа за Луан Старова одржа академик Влада Урошевиќ, а поздравен говор одржа и академик Абдулменаф Беџети.
На конференцијата беше присутно и потесното семејство, а благодарност до сите присутни упати Гзиме Старова, сопруга на Луан. Конференцијата ја збогати музичкиот настап на „Дуо Шкупи“, во кое членуваат Јета Старова Мемети и Ермал Мемети.
Во својата поздравна реч ректорката Биљана Ангелова истакна дека академик Луан Старова изврши голема мисија за нашата културна и општествена афирмација во светот, не само преку своите извонредни и монументални дела, туку и преку сета своја дејност на мислител, двигател, културен деец, истакнат општественик од кого истекуваа „златни реки“ пораки и поуки оти беше вистински визионер со јасно поставена мисија.
– Академик Луан Старова е грандиозен автор на светската „мапа“, кој ја афирмираше нашата книжевност и култура во светот, и како автор, и како универзитетски професор и научник, и како угледен амбасадор, дипломат од висок ранг. Репрезентативен, со извонредна мисија за афирмација на македонската книжевност, наука и култура во светот, автор полиглот што твореше на извонреден албански, македонски и француски јазик – заклучи проф. д-р Биљана Ангелова.
Деканот на Филолошкиот факултет, проф. д-р Владимир Мартиновски, во својот говор ги истакна сите аспекти на творечката, научно-истражувачка и дипломатска личност на академик Луан Старова.
– Луан Старова како писател и истражувач, не може темелно да се анализира и проучува без да се има предвид Луан Старова како мислител и педагог, експерт за француската и франкофонските книжевности и книжевни идеи, но и темелен познавач на сите балкански книжевности, преведувач на плејада други автори, но и самопреведувач, поливалентен писател едновремено вгнезден во две и повеќе култури, дипломат во земји од три континенти (Тунис, Палестина, Франција, нерезидентен амбасадор во Шпанија и Португалија, прв македонски претставник во УНЕСКО) и докажан културен деец со космополитски визури, поет и еден од најактивните медијатори со голем број поетски традиции преку неуморните активности во СВП, личен пријател на поетите што ги приопштува низ препевите, но и личен пријател на неговиот преведувач на француски, амбасадорот Патрик Крисман, потоа, патописец и новинар, уредник и семеен хроничар, луциден соговорник и пријател на реномирани интелектуалци и творци од различни меридијани (од Амин Малуф и Едгар Морен до Исмаил Кадаре и Предраг Матвеевиќ), ангажиран интелектуалец со меѓународни хоризонти и член на четири академии (редовен член и потпретседател на МАНУ, почесен член на ААН, член на Европската академија на науките и уметностите и на Медитеранската академија), загрижен аналитичар на бремето на историското како во балкански така и во поширокиот контекст, но и суптилен опсерватор на човековата природа преку уметничкиот дискурс – истакна Мартиновски.
Со научната конференција Филолошкиот факултет „Блаже Конески“ и УКИМ достојно ја одбележаа творечката, научноистражувачка и дипломатска дејност на академик Луан Старова.
(Текстот е објавен во „Културен печат“ број 204, во печатеното издание на весникот „Слободен печат“ на 11-12.11.2023)