МЗТ Скопје дел од иницијативата „Спортистите против коронавирусот“ (ВИДЕО)
– Само заедно, тимски можеме да излеземе како победници против овој вирус – се зборовите на тренерот на популарните штркови, Кочов.
Коронавирусот е противник кој мора да се наттрча, натскока, тактички надмудри и на крајот убедливо да сѐ – победи.
Ова е заедничка борба на сите нас, во која активно се вклучуваат и спортистите, во овој случај и кошаркарите, тренерите, управата и сите останати кои се дел од актуелниот шампион на Македонија и синоним за македонската клупска кошарка на европска сцена, МЗТ Скопје Аеродром.
– Почитувани, ве поздравувам, ја поддржувам кампањата „Спортистите против коронавирусот“. Само заедно, тимски можеме да излеземе како победници против овој вирус – се зборовите на тренерот на аеродромскиот клуб, Ѓорѓи Кочов кој воедно е дел од стручниот штаб на селекторот Тодоров.
Популарните „металци“ активно се приклучува на иницијативата #СпортистиПротивКоронавирусот, која веќе отвори наменска сметка за донации:
Жиро сметка : 240577112287787 – Уни Банка
– Ја поддржувам кампањата „Спортистите против коронавирусот“. Јас донирав, донирајте и вие – вели кошаркарот на МЗТ и воедно репрезентативец, Дамјан Стојановски.
Собраните средства ќе бидат донирани за обезбедување на заштитни маски и опрема за здравствените работници, кои се во првиот одбранбен ред, како и за обезбедување на средства за дезинфекција и хигиена за социјално најзагрозените лица.
– Да покажеме солидарност и хуманост. Овој натпревар го играме за сите наши граѓани, за самите нас, за нашите семејства, за нашите деца. Знаеме што значи тимска игра и сигурни сме дека со заеднички сили ќе го победиме и коронавирусот – информираат од КК МЗТ Скопје Аеродром.