Кошаркарите на МЗТ Скопје забележаа сигурна и убедлива победа над Тиквеш со 102-77 во третото коло од плејофот во македонската лига.

Натпреварот почна со поизрамнета игра, при што тимот од Аеродром имаше мала предност по првата четвртина (24-21). Сепак, во втората четвртина МЗТ го наметна својот ритам и со серија поени се одлепи на 52-36 до паузата.

Дилемите околу победникот беа решени уште на почетокот од второто полувреме, кога МЗТ доминираше и направи огромна разлика од 89-51. До крајот, Тиквеш само успеа да ја ублажи негативата и да го постави конечниот резултат.

Најефикасен во редовите на победникот беше Хуан Дејвис со 22 поени, надополнети со 13 скокови и две асистенции, додека кај Тиквеш се истакна Тајрон Хенри со 19 поени, четири скока и две асистенции.