Делегацијата на ЕУ и „ЕУ Хаус Скопје“ во соработка со меѓународно признатиот македонски филмски композитор, музички продуцент и пијанист Дуке Бојаџиев го одбележуваат 9 мај – Денот на Европа.

На специјалната вечер во Градскиот парк во Скопје, Дуке и неговите еминентни гости, двајца раскажувачи и 20-члениот оркестар на Македонската филхармонија ќе ги изведат најновите дела од неговиот опус, дополнети со нови музички композиции инспирирани од професионалниот и приватен престој на Дуке во Франција и Шпанија во изминатиов период.

Перформансот e спој на неговата оркестарска и филмска музика, фузија на традиционални вибрации од балканскoтo и медитеранскoто музичко поднебје, поддржани со нарација на вечната љубовна поезија на Руми на македонски и албански јазик. Станува збор за уникатно искуство за Денот на Европа, проследено со мултикултурна музичка прослава на љубовта, мирот и единството.

Покрај Дуке Бојаџиев, како специјални гости ќе настапат Бахрамџи, „Медуса Одисеј“, Миријам и Иса, Наташа Петровиќ и Амернис Нокшиќи. Диригент со дваесетчлениот оркестар на Македонската филхармонија е Ана Спасовска.

Настанот ќе се одржи на 8 мај, со почеток во 20 часот, кај Езерцето во Градски парк. Влезот ќе биде слободен за сите посетители.

Концертот е дел од серијaлот настани во организација на „ЕУ Хаус“ со кои се обележува 9 мај – Денот на Европа. Изложби, музички изведби, како и регионална конференција за млади се дел од прославата.

(Текстот е објавен во „Културен печат“ број 127, во печатеното издание на весникот „Слободен печат“ на 7-8 мај 2022)