Молдавски медиум пишува дека се планирал атентат врз Бујар Османи во Тираспол минатиот месец
Мaкедонскиот министер за надворешни работи Бујар Османи бил планирана цел на напад за време на посетата на Молдавија минатиот месец во својство на претседавач со ОБСЕ, пишува молдавскиот медиум „Реалитатеа“.
„Според пишувањето на „Реалитатеа“, бил испланиран напад врз Мисијата на ОБСЕ во Бендер, а експлозијата требало да се случи пред еден месец, на 14 февруари, кога претседавачот на ОБСЕ Османи бил во посета на овој регион.
„Реалитатеа“ пишува дека локалните проруски власти во Тираспол, главниот град на Транснистрија – регионот на североистокот на земјата практично отцепен од Молдавија, но непризнаен од ниту една друга суверена земја, ја обвиниле Службата за безбедност на Украина дека го испланирала нападот.
Како што пишува информативниот портал, било предвидено нападот да се изврши со автомобил во кој бил поставен експлозив. Според тврдењето на надлежните, автомобилот требало да биде паркиран во близина на замокот Бендер.
По спречувањето на оваа намера кај Бендер, делегацијата на Османи, која броела околу 20 луѓе, требало да биде нападната на патот за молдавскиот главен град Кишињев, но тогаш сторителот се откажал од идејата да нападне за да не го изложи во опасност сопствениот живот, пишува „Реалитатеа“.