Модната линија на Ријана на пауза: „LVMH“ ја повлекува поддршката за нејзиниот бренд
Модната линија на пејачката Ријана, лансирана во 2019 година, влезе во историјата како прва луксузна марка водена од афроамериканка. Исто така беше втората луксузна модна куќа која започна од нула со поддршка на францускиот конгломерат „LVMH“ по Кристијан Лакроа во 1987 година.
Но, сега француската корпорација „LVMH“ драстично ја намали поддршката за брендот „Fenty“ на Ријана, имено затоа што не успеале да го привлечат планираниот меѓународен интерес.
„По периодот за прибирање средства во кој „L Catterton“ купи удел во „Savage X Fenty“, „LVMH“ и Ријана ја потврдија својата амбиција да се концентрираат на растот и долгорочниот развој на екосоставот на „Fenty“ со посебен фокус на козметика, долна облека и производи за нега на кожата. Во меѓувреме, Ријана и „LVMH“ заеднички одлучија дека ќе направат пауза од враќањето на работата во ЕУ, барем додека не се промени ситуацијата на подобро“, гласеше заедничкото соопштение на „LVMH“ и Ријана.
Ова е втор пат „LVMH“ да откаже поддршка за бренд лансиран од поп-ѕвезда. Во средината на 2018 година тие престанаа да го поддржуваат „Edun“, модна компанија основана од Али Хјустон и нејзиниот сопруг Боно.
Од компанијата велат дека ќе се фокусираат на производите на „Fenty Beauty“ и „Fenty Skin“ бидејќи постигнаа значителни резултати на пазарот.
„LVMH“ поседува заеднички дел од „L Catterton“, кој инвестираше 115 милиони долари во „Savage X Fenty“ покажувајќи дека гледа профитабилна иднина за брендот.
„Долната облека го слави телото и тоа е мисијата на „Savage“ – многу моќен збор за мене. Ми ги буди идеите за самодоверба, како и преземање контрола и одговорност за моите сопствени постапки. Овој бренд е дом, центар и сигурен простор за секого – без оглед на изгледот, големината, културата, полот и сексуалната ориентација. Тој ги претставува сите и ја потврдува сечија убавина, без оглед на сè“, рече Ријана во посебна изјава.
„LVMH“ започна да ја поддржува модната куќа „Fenty“ во почетокот на 2019 година. Есента истата година, Ријана ја претстави својата долна облека на Модната недела во Њујорк.
Долната облека на Ријана ја носеа Кара Делавиљ и Џиџи Хадид, како и низа други модели со најразлични бои на кожа и форми на тело.