Ние континуирано реагиравме за начинот на избор на новиот Народен правобранител со барања да се поништи постапката, изјави за „Слободен печат“ извршната директорка на Хелсиншкиот комитет, Уранија Пировска. Прашана за коментар околу квалификациите на Насер Зибери таа кусо одговори дека она за што претходно од Мрежата за дискриминација апелирале,  сега се остварило.

„Оправдано се сомневаме дека огласот намерно не се дистрибуирал во јавноста бидејќи кандидатот за Народен правобранител е веќе договорен помеѓу партиите. Оттука, пропаѓаат сите ветувања за департизација на општеството, а особено за независните институции за човекови права кои имаат мандат да ги штитат правата на граѓаните од власта. Прашуваме, како е возможно кандидат назначен по партиски клуч ефикасно да ги штити правата на граѓаните кога тие се повредени од страна на истата власт?!“, соопштија неодамна од Хелсиншки комитет.

Оттаму додаваат дека ветувањето за „едно општество за сите“ ќе остане празна предизборна флоскула доколку не се назначуваат соодветни кадри.

Со 61 пратенички глас „за” и ниту еден „против”, нотарот и кандидат на ДУИ за прв премиер Албанец, Насер Зибери беше избран за Народен правобранител. За време на собраниската расправа пратениците од опозициските партии бараа предлогот да се повлече, бидејќи Зибери, како што велат, не е натпартиска личност.